بعد بغدودة.. شكوى جديدة من بطل إفريقيا ضد اتحاد المصارعة

تلقى الاتحاد المصري للمصارعة صدمة جديدة في الساعات الأخيرة، بعد ظهور شكوى من أحمد إبراهيم عجينة، لاعب المنتخب الوطني للمصارعة الرومانية.

وكتب عجينة عبر صفحته الرسمية: "تكملة لموضوع أحمد فؤاد بغدودة، أنا اسمي أحمد إبراهيم وشهرتي عجينة، أنا لاعب مثلت مصر للمصارعة الرومانية من 2013 لحد دلوقتي ولاعب في المؤسسة العسكرية إسكندرية".

وأضاف بطل المصارعة الرومانية: "اتصابت في بطولة تحت اسم منتخب مصر، وبعد عرضي للدكتور طالبني بعمل عملية جراحية في الكتف، لا الاتحاد المصري للمصارعة تكفل بالعملية ولا حتى النادي، وأنا تكفلت بمصاريف العملية كاملة وهى 50 ألف جنيه".

وواصل عجينة: "مع العلم أن والدي صياد وعلى قد حاله، ومع ذلك جمع المبلغ بالعافية بعد العملية، لا الاتحاد كلمني ولا النادي، وكمان النادي شال القبض بتاعي اللي كنت بقبضه اللي هو 1200 جنيه".

وأردف المصارع: "كنت بقبض 1200 وأنا بطل إفريقيا بطل عرب وخامس دورة ألعاب بحر ابيض في أسبانيا وبطل إبراهيم مصطفى وعاشر عالم… طالب توصيل الرسالة مش أكتر، مثلت النادي من وأنا عندي 12 سنة، وكنت بطل جمهورية".

وأكمل بطل إفريقيا: "في الآخر محدش يقولك أخبارك أية حتى، من 2013 لحد من كام شهر أول إفريقيا وأول عرب وأول إبراهيم مصطفى وعاشر عالم وخامس بحر ابيض غير الجمهوريات وأنا قبضي في النادي 796 جنيه بعد الضرائب، ومكنتش بتكلم ولا بقول حاجة عشان حبي للعبة والفخر اللي كنت فيه بمثل فيه مصر وأرفع علمها".

اقرأ أيضًا: بعد 11 عاما من الغياب.. دورتموند على أعتاب التتويج بالدوري الألماني

واختتم بطل العرب: "اتصبت لتاني مرة في كتفي في التمرين داخل بيتي داخل المؤسسة العسكرية الإسكندرية، بعدما أجريت العملية على حسابي، النادي قرر يقف جمبي ويوقف القبض بتاعي عشان حتى العلاج الطبيعي والتأهيل أعمله على حسابي وأول ما أبقى كويس يقولولي مش ناوي تيجي بيتك مستنيك".