أمل جديد في قصة البلوجر سارة: «ادعولي العين الشمال خلاص فيها ضمور»
«ادعولي في الشهر الكريم».. بتلك الكلمات وجّهت البلوجر سارة محمد، رسالة جديدة لمحبيها طالبتهم فيها بالدعاء لها، كاشفة وجود أمل لاستعادة بصرها بعد أن فقدته في هجوم بسلاح ناري من مجموعة لصوص على أحد الطرق في الإسكندرية، خلال وجودها مع خطيبها في السيارة
البلوجر سارة محمد توجه رسالة لمتابعيها
وقالت سارة محمد عبر مقطع فيديو جديد، بموقع فيسبوك: «أنا طالعة أطمنكم عليَّ وأشكركم جدًا لدعمكم لي وللناس اللي بتدعيلي عند الكعبة.. دي أكتر حاجة بتسبب لي السعادة، أنا حابة أطمنكم عليَّ أتابع معاكم، أول حاجة حابة أقولها ليكوا إني الحمد لله راضية بكل حاجة أنا وصلتلها، أنا آه فقدت عيني بس عندي أمل إنه في يوم من الأيام إن أرجع أشوف.. لسه الأمل متقطعش عندي، أنا راضية حتى لو كل حاجة اتأخرت.. إن شاء الله ربنا يجعلني من الصابرين وأهل الجنة».
وتابعت البلوجر سارة محمد: «من يومين روحت القاهرة عملت أشعة على العصب البصري لعيني اليمين، لأن خلاص العين الشمال حصلها ضمور ومفيش فيها أمل، وللأسف نتيجة الأشعة وضحت إن عصب العين ضعيف جدًا، بس أنا مزعلتش لما عرفت وقولت الحمد لله، وبردوا عندي أمل في ربنا إنه هيعوضني خير».
رحلة علاج البلوجر سارة محمد
وأضافت سارة: «رحت النهاردة لدكتور هنا في الإسكندرية وخدت حقن وعلاج مقوي للعصب، واداني أمل وتفاؤل كبير جدًا وهيحاول معايا.. أنا حابة أشكر الدكاترة اللي عملولي العملية وكل اللي وقفوا جنبي ومقصروش معايا، وحابة إن الكل يدعيلي في الشهر الكريم إن الأمل يزيد عندي».
وقبل أيّام، ظهرت سارة عقب الحادث المأسوي الذي تعرضت له وفقدت على إثرها بصرها بشكل كامل، مع صديقتها البلوجر شاهي موسى على تيك توك، لتطمئن الجمهور على حالتها الصحية، وتناشد بسفرها للخارج من أجل العلاج.
