أول تعليق من ريهام سعيد بعد الحكم على سما المصري بالحبس عامين بسبب سبها
علقت الإعلامية ريهام سعيد، على الحكم الذي صدر على سما المصري، بالحبس لمدة سنتين وتغريمها 100 ألف جنيه، بتهمة سبها وقذفها.
وكتبت ريهام سعيد عبر حسابها على موقع الصور والفيديوهات الشهير "إنستجرام": "سبحان الله السنة اللي فاتت زي النهاردة استقبلت خبر وقفي من المجلس الأعلى للإعلام بصدمة لإني معملتش حاجة في حياتي أهم من مساعدة مرضى السمنة، ونصيحتي كانت من خوفي عليهم لأن أنا مريضة سمنة وأخدت وعد أن كل واحد بيعاني هايتعالج، فحتى لو كلامي قاسي يبقى عشان يقبلوا على العلاج اللي تعبت أوي عشان أخليه بالمجان حتى خارج التبرعات".
وتابعت ريهام سعيد: "ناس كتير اتخلت عني كانت بتعرفني فقط لشهرتي راحوا والأقنعة اترفعت واتصدمت في ناس كتير أوي ماشافوش مني غير كل خير ده غير الإهانة والسب، ناس كتير أوي غلطت فيه وهما مش فاهمين حاجة، في نفس يوم وقفي من غير شماتة ولكن بقناعة أن التوكل على ربنا فقط حتى لو ملكش حد كفاية بعد سنة النهاردة يتفك الوقف واللي عايرني إني مش بشتغل اتطرد شر طردة والمجلس الأعلى اتحل وسما أخدت حكم واللي كانوا بيعملوا فيديوهات ضدي حالتهم كرب واعتذروا".
اقرأ أيضا| تعرف على نور عمرو دياب التي أثارت ضجة وتصدرت التريند بصورها
وأضافت: "في أقل من سنة ولسه كل واحد غلط فيه فاكر إني طنشت هياخد عقابه لأن ده حقي وسمعتي وسمعة أولادي اللي تعبت فيهم أوي وضيعت عمري رجع الحق عشان ربنا عادل وعظيم وكريم واللي عند ربنا مابيروحش، بشكرك يا رب".
ووجهت الشكر لكل من ساندها في محنتها، وقالت: "بشكر المحامي شعبان سعيد اللي في ضهري طول الوقت، بشكر زوجي، بشكر أي حد كلمني أو سأل عليه وأنا مش بشتغل ومذيعة ومكسرة الدنيا، بشكر الناس الأصيلة الجدعة زي الفانز وزي خالد الصواف وحمدي بدر ومحمد رمضان وياسمين عبد العزيز وبدرية طلبة ودينا ومي كساب وإيمان العاصي وأصالة وأحمد رزق وعلاء الشربيني وسعد الصغير، بشكر كل واحد عمل فولو البروفايل ده وأنا مش حاجة وولا حاجة مش بشتغل ومش عارفين هاشتغل تاني ولا لأ، مبسوطة بالسنة اللي بعدها مفيش حواليه غير الناس اللي بتحبني بجد.. بشكرك يا رب.. وبشكر القضاء العادل والدولة المحترمة، أخيرا الحق بقى بيرجع في مصر في عهد ريس محترم و قوي الحمد لله".
وقرر المجلس الأعلى لتنظيم الإعلام الصادر في 28 أغسطس 2019 برقم 53 لسنة 2019، بمنع ريهام سعيد من الظهور الإعلامي لمدة عام على جميع وسائل الإعلام المرئية والمسموعة والمقروءة والإلكترونية، وذلك على خلفية الجدل الواسع بعد تصريحاتها المسيئة فيها لأصحاب الوزن الزائد.
