محمد سيد أحمد يكتب: الاقتصاد بالبلدي
خلال الفترة الزمنية السابقة لا حديث يعلو فوق الحديث عن الاقتصاد فليس من المفترض أن نكون جميعاً خبراء في الاقتصاد و لكن مما لا شك فيه أننا جميعا اصبح لدينا الشغف بالاقتصاد وأصبح حديثنا في الاقتصاد يتقارب من حديثنا عن مبارايات كرة القدم..
وأصبح الحديث عن الاقتصاد ليس مقصوراً على فئة محددة بل أصبح بين جميع الفئات الاجتماعية والعمرية والفكرية، ومن ثم رأينا أنه علينا مسئولية وطنية وعلمية في توضيح بعض المفاهيم الاقتصادية، وهذا ما سنبدأ في طرحه خلال الفترة المقبلة بواسطة مقال أسبوعي تحت عنوان "الاقتصاد بالبلدي" بغرض إيضاح بعض المفاهيم الاقتصادية ببساطة، وسنلقي الضوء في ذلك الأسبوع على معنى كلمة "تعويم الجنيه"..
ما هو تعويم الجنيه؟
تعويم الجنيه هو تحرير سعر صرف الجنيه بحيث يحدد سعره وفقاً لآلية العرض والطلب في السوق المحلية والدولية، دون أي تدخل من الحكومة ممثلة في البنك المركزي، حيث يقتصر دوره على التحكم فقط في توقيت تحرك الأسعار.و ينقسم التعويم الى نوعين.
النوع الأول: التعويم الحر
وهو تحرير سعر صرف الجنيه بكل حرية وفقاً لارتباطه بسلة من العملات مثل الدولار واليورو والاسترليني، وتحدد قيمته بناءً على حركة العرض والطلب عليه مقابل العملات الأجنبية الأخرى دون أي تدخل من الدولة أو البنك المركزي.
النوع الثاني: التعويم المدار
وهو التعويم الذي يخضع لتحكم البنك المركزي، حيث تتدخل لجنة السياسة النقدية في تحديد سعر الجنيه كلما دعت الحاجة إلى تعديل هذا السعر مقابل بقية العملات، استجابة لمجموعة من المؤشرات مثل مقدار الفجوة بين العرض والطلب في سوق الصرف، ومستويات أسعار الصرف الفورية والآجلة، والتطورات في أسواق سعر الصرف الموازية.
وبواسطة استعراض تعريف أنواع التعويم (الحر – المدار) ويجري الاعتماد على النوع الأول من التعويم (التعويم الحر) في الدول الرأسمالية الصناعية المتقدمة، صاحبة عملات الدولار والجنيه الاسترليني والفرنك السويسري، ولكن في حالة الجنيه المصري قد يكون الأمر صعباً، في ظل ميزان تجاري هابط، وتراجع حاد في احتياطيات النقد الأجنبي لدى البنك المركزي، والندرة في الدولار أدى إلى شلل حركة الاستيراد وتوقف العديد من الأسواق. فيتم الاعتماد على النوع الثاني من التعويم (التعويم المدار).
تعويم الجنيه بالبلدي
بالبلدي كده انت عندك محل ملابس بتبيع القميص بمبلغ 250 جنيه وأنت بتشتري القميص 170 جنيه يعني كسبان 80 جنيه وبتبيع في اليوم 10 قمصان بمكسب يومي 800 جنيه يعني في الشهر بتكسب 24000 جنيه وبتدفع الالتزامات اللي عليك 10000 جنيه يعني صافي ربحك في الشهر 14000 جنيه و الدنيا زي الفل وعارف تأكل العيلين و المدام وماشي الحال.
بعد كام متر فتح جنبك محل ملابس جديد بيبيع قميص ماركة أخرى بمبلغ 200 جنيه و الناس بتشتري منه بعد شهرين تلاتة لقيت نفسك بتبيع في اليوم 5 قمصان بس بتكسب 400 جنيه في اليوم يعني 12000 جنيه في الشهر وبرضوا بتدفع التزامات 10000 جنيه يعني صافي ربحك في لشهر بقا 2000 جنيه بس
ولأن عندك كمية كبيرة من القمصان في المخزن طبعا أنت أول حاجة هتفكر فيها تقلل السعر بتاع القميص يمكن تبيع اكتر خليت القميص بمبلغ 200 جنيه بدل من 250 جنيه و تكسب قليل و تبيع كتير و الدنيا تمشي ( بس خلي بالك انت اتأخرت شوية في القرار ده ) المهم انك نزلت السعر ل 200ج يعني مكسبك 30 جنيه في القطعة على امل انك تعرف تبيع زي الاول و اكتر و لكن خلاص الناس اتعودت تجيب من المحل التاني و لما انت نزلت السعر ل 200 جنيه برضوا مبعتش غير 5 قمصان يعني مكسبك 150 جنيه في اليوم يعني 4500 ف الشهر و التزاماتك 10000 جنيه و طبعا مش هينفع تقفل المحل اهو برضوا احسن من مفيش و طبعا الالتزامات بتزيد عليك و البيع قليل فقررت انك تنزل السعر اكتر و تكسب بس 10 جنيه و تبيع ب 180 جنيه و هنا ناس قليلة اللي اشتروا و باقي الناس قالت استنى شوية هو هينزل السعر تاني و بالتالي مبقاش ليك قيمة
و اخر قرار هتاخده علشان تنقذ نفسك انك هتبيع القميص من غير ما تحدد سعر يعني اللي هيجي يقولك هشتري القميص ب 50جنيه هتبيع و اللي هيقولك ب 100 جنيه هتبيع و اللي هيقولك ب 200 جنيه هتبيع و تقعد انت مع نفسك اخر الشهر تحط السعر ده على السعر ده و تحاول تعوض خسارتك و تعرف تبيع اكتر و تحاول ترجع مبيعاتك زي الاول و تحط سعر متوسط تكسب منه حتى لو قليل لغاية ماتكسب ثقة الناس و ترجع واقف على رجلك زي الاول.
طبعا لما انت محددتش سعر و تركت السعر للعرض و الطلب و متدخلتش في الاول ده اسمه (تعويم حر) و لما قعدت آخر الشهر و حطيت مبلغ معين تبيع به متقلش عنه ده اسمه (تعويم مدار).
و طبعا لو معاك فلوس في ظل تعويم الجنيه و حالة عدم الاستقرار حاول تشتري بيه دهب او فكر في استثمار عقاري المهم متخليش معاك نقدية سائلة على الأقل خلال تلك الفترة علشان تضمن ان فلوسك قيمتها تزيد أو على الأقل تفضل زي ماهي أو قريبة من قيمتها الحالية.
