اشتاقتْ.. مناجاة لرسول الله
اشتاقت ليك العيون واشتاق لك أكتر القلب
يا اللي اصطفاك رب العرش إنك تكون ليه الحبيب
يا اللي انت أحب ليا من نفسي والأم والأب
أنساهم وأنسى نفسي ولا اسمك عن قلبي لحظة يغيب
يا رسول الله .. يا رسول الله
..
مستني اليوم اللي أشوفك فيه في منامي
مستني اليوم اللي يكون فيه مسجدك قدامي
مش قادر أتخيل اللحظة.. بس عارف إني هبقى اتولدت من جديد
همومي كلها مش هيبقى ليها وجود جوايا
وفي ثانية واحدة عقلي هيسترجع ألف حكاية
....
حكايات من سيرتك الطاهرة علمتنا على الأذى نرضى ونصبر
حكايات علمتنا إن بعد الصبر والرضا ربنا بيجبر
علمتنا التسامح والرحمة حتى ف عز القوة
وكنت لينا في كل وقت أفضل مثال وقُدوة
علمتنا الشهامة والشجاعة واللين
وإن مكارم الاخلاق هي الدين
....
وفي يوم ما كل واحد فينا ينسى أي حد
هتكون انت يا رسول الله بتنادي "أمتي.. أمتي"
وفي وقت ما نبقى خايفين لأقصى حد
ربنا يرد عليك "رحمتي رحمتي"
......
اتولدت يا مصطفى مبرأ من كل العيوب
كنت الشمس اللي سطعت بعد ضلمة الغروب
وكان يوم ميلادك للعالمين أجمل بداية
يوم وفاتك خسرت الدنيا أعظم الرجال
والدمع من عيون المسلمين سال
بس كنت أتممت رسالتك وكانت لينا الهداية
.....
يا ريتك يا رسول الله كنت دلوقتي بينا
أكيد مع وجودك ما كانش ده هيبقى حالنا
كتر الظلم والحروب والصراع،
وناس كتير إسلامها ضاع
بس احنا دايما هنبقى متأكدين
إن الخير في أمتنا إلى يوم الدين
الخير في أمتنا إلى يوم الدين
حتى نلقاك يا رسول الله
سما الشوربجي - الصف الثالث الثانوي
اقرأ أيضًا: فنانون: الكاريكاتير يتراجع في الصحف والمواقع الإلكترونية