”أخد العسكري المريض ووالده ووصلهم”.. مجند يكشف لـ”الطريق” شهادته على إنسانية الشهيد منسي
تعددت مواقفه مع الأخرين ولكن يظل الثابت الوحيد هو إنسانيته، التي لم يختلف عليها فرد تعامل معه في أي من الأمور الحياتية، لذلك وقع خبر وفاته واستشهاده على قلوب محبيه كالصاعقة، وبالرغم من مرور السنوات ولكن لا ينساه أحد، إنه الشهيد أحمد منسي، الذي تحل اليوم الذكرى الرابعة على استشهاده.
"الطريق" يكشف واحدة من المواقف الإنسانية في حياة الشهيد أحمد منسي مع المجند جمال حسن.
ويقول الشاب جمال حسن، إن معرفته بالشهيد أحمد منسي، بدأت خلال قضاء خدمته في تأمين سجن الحضرة في محافظة الإسكندرية عام 2012، وحينها كان في رتبة قائد سرية.
وأضاف "جمال" في تصريحات لـ"الطريق" أنه بالرغم من قضاء فترة قصيرة في الخدمة مع الشهيد "منسي"، إلا أن كان يستشعر إنسانيته في تعامله معه، قائلاً: "الشهيد والقائد منسي قعد معانا فترة صغيرة وبعد كدا راح رئيس عمليات الكتيبه 103 صاعقة.. وكنا زعلانين أنه هيسيبنا لأنه كان إنسان وطيب وبيحب كل الناس.. ومن حظي الحلو بعد ما خلصت الجيش اشتغلت في مدينة العاشر من رمضان لأني خريج كلية تجارة، وعرفت بالصدفة البطل منسي في نفس المكان وكنت بقابله كتير".
وروى الشاب جمال موقف كان شاهد فيه على إنسانية الشهيد "منسي"، قائلاً: "من المواقف اللي عمري ما هنساها كان في العسكري محمد يونس تعبان جدا وكان كل شويه يجي يجدد الإجازة لظروف صحية ومكنش ينفع يدخل الجيش فقائد الكتيبة قاله هو اللي لازم يجي يأخد التصريح بالإجازة".
اقرأ أيضًا: ”الطريق” يكشف هدية الشهيد منسي لوالدته في عيد الأم
واستكمل: "لما القائد منسي شافه قاله إنت إيه اللي جابك قاله قائد الكتيبة طلبني أني أجي أخد التصريح، قاله ثواني إنت إزاي مخرجتش رفد طبي، وبصوت عالي القائد بينده على الأفراد علشان يعمله تصريح إجازة، قاله إنت جاي مع مين قاله مع والدي قاله هو فين، فنده القائد عليه وراح يجيبه وقاله ده رقم تليفوني لما يكون فيه حاجة زي كدا قولي وأنا اللي اجيب التصريح لحد البيت، الراجل حضن القائد "منسي" حسيت ساعتها أن القائد من جواه كان زعلان لدرجة أنه بعد الموقف ده أخد الراجل بعربيته ووصله للموقف يركب منه، لأن إحنا كنا في الشارع تأمين وطلب من اللجنة أنها تعمل لمحمد رفض صحي من الجيش علشان حالته كان مريض جدًا.. وبعدها رجع القائد منسي وبدأ يحكي قد أي إحنا شعب طيب وكان ديما بيحكلنا عن أصحابه الأوفياء لتراب البلد".