ماذا قالت أسما شريف منير بعد انفصالها عن محمود حجازي؟
قررت أسما شريف منير أن تشارك متابعيها تجربة أزمتها الأخيرة بعد انفصالها عن زوجها الفنان محمود حجازي، وتنقل لهم خبرتها عن هذه التجربة التي تمر بها بدون الخوض في التفاصيل عن أسباب الطلاق، في تجربة تعد الثانية لها.
وكشفت أسما شريف منير أنها كانت قد قررت أن تبتعد عن مواقع التواصل الاجتماعي وتختفي لفترة، لكنها تشعر بمسؤولية تجاه أي امرأة تمر بظروفها، والكثير من النساء تستلهم منها الطاقة لتكمل حياتها، وذلك بحسب منشورها عبر حسابها الخاص بموقع التواصل الاجتماعي "فيسبوك".
نصائح أسما شريف منير
وكتبت أسما في منشورها رسالة طويلة توجه فيها نصائح لكل امرأة تمر بتجربة الطلاق، مشددة على ضرروة أن تتقرب إلى الله أكثر، وهو ما تفعله حاليًا، حيث أكدت أنها تسمع القرآن الكريم، حتى يساعدها الله على تخطي هذه المرحلة.
وكتبت أسما في منشورها: أنا بشر بتألم بزعل بعيط، بغلط، باثور وحياتي مش بمبة مسخسخ بس برضه ربنا اداني طاقة إيجابية واداني نعم كتير منها إنتم، وحبكم ليا ودعواتكم ليا دي نعمة كبيرة أوي، والشهرة اللي ربنا ادهاني برضه كون إن أبويا (أعظم أب ربنا يحفظه ويخليهولي ويبارك في عمره) تعب في مشواره وده سهِل وجودي ومعرفة الناس بيا، وأنا عارفة إن في جزء كبير حبوني لمجرد إنهم بيحبوه كل ده برضه عشان سبب".
وتابعت: "أول مرة انفصلت واتكلمت في موضوع طلاقي ساعد ستات كتير إنهم يحسوا إنهم مش لوحودهم و إنهم ممكن يقفوا علي رجليهم تاني ويشتغلوا ويتخطوا الألم، و لما اتجوزت وكنت مطلقة ومعايا بنت حسوا إن في أمل وإنهم مش معيوبين ولا ناقصهم حاجة عشان يستخسروا في نفسهم السعادة، وبداية حياة جديدة لأنه ده حلال ربنا، وحاليًا بعد ما القصة اللي ادت ناس كتير أمل إن في حب وعوض انتهت".
أكيد زعلانة
وواصلت:"ناس كتير بعتت لي إن الخبر خلاها تحس بيأس وفي ناس أحبطت، وده وقفني لحظة كده وحسيت بمسؤولية، طيب نرجع بقي للشهرة اللي ربنا ادهاني أكيد ليها سبب أكيد في سبب لوجودي في الدنيا فقلت لازم أقول الكلام ده وهو من أعماق قلبي، بعد اللي حصل أكيد زعلانة وأي فراق بيكون وجع وبيسيب فراغ وبيعمل برجلة، بس ساعات بيكون سيناريو رباني لسبب أكبر مننا إحنا مش فاهمين ليه دلوقتي بس بنفهم قدام".
مشاعري الجياشة سبب وجعي
واستطردت: "أنا شخصية مندفعة في مشاعري الجياشة اللي ساعات بتكون سبب وجعي، لكن المرة دي فكرت كتير بعقلي وحسيت إني عندي مسؤلية تجاه الستات اللي بتابعني، في الأول كنت مقررة اختفي من السوشيال ميديا شوية حلوين واعزل نفسي بس حسيت إن في ناس بتستمد طاقتها مني وبتقارن نفسها بيا عشان بنعدي بنفس الموقف مثلاً فبتكون عايزه تشوف هعمل ايه، أو ساعات برضه عشان لما حد بيشوف بلاوي الناس بتهون عليه بلوته، ربنا حطني في اختبار حاليًا وابتلاء، قعدت اقرأ واتفرج علي حاجات تساعدني فقلت أقول لأي ست بتعدي بنفس الموقف أنا بعمل ايه حاليًا".
ماذا تفعل أسما شريف منير حتى تتخطى تجربتها
واستكملت: "أولًا لقيت إن أحسن حاجة إني اترمي بين إيد ربنا وارضى بقسمتي ونصيبي اللهم لا اعتراض، بس في نفس الوقت ماستسلمش علشان مهما حصل الدنيا هتكمل حتي لو أنا وقفت الدنيا هتفضل تدور كده كده واللي بيطبطب دلوقتي برضه عندهم حياة محدش هيسيب حياته عشان حد، لازم أشوف أكل عيشي عشان عندي مسؤليات وأرواح مسؤولة مني أولهم بنتي، الست اللي بتيجي تساعدني في البيت، حتي كلابي وقططتي وغيرها".
أسما شريف منير تكشف عن موقها من الارتباط والزواج للمرة الثالثة
واستكملت: "لآخر نفس في عمري مش هفقد الأمل في الحب ولا اللمة وفى العيلة الصغيرة اللي بحلم بيها ولا عقول الناس كلها وحشة، رغم إن في ناس هتقول خلاص بقي عيشي لبنتك وخلاص بقي مرتين كفاية أوي كده، اه بقي دي مزواجة أو دي أكيد العيب فيها اياً كان الناس هتسميني ايه ده حقي وحلال ربنا، هو كده كده الكلام ده لسه بدري أوي عليه لاني محتاجة وقت اتعافي وأقف علي رجلي تاني بس الكلام ده لحد في نفس موقفي وخايف من كلام الناس، ماحدش يقدر يحدد لك ده طالما حلال وربنا موافق محدش له حق ولا كلام الناس يفرق، بدل ما تغضبي ربنا في المداري اعملي الصح ده ستر وحقك مش بالعدد خالص".
نصائح أسما شريف منير لمتابعيها لتخطي أزمة تجربة الطلاق
وأردفت: "أما بقي لو زيي في التوقيت قربي من ربنا أكتر من العادي، اشتغلي علي عيوبك ونفسك، طوري نفسك، اشتغلي أو ابتدي شغل، اتعلمي حاجة جديدة تنفعك، العبي رياضة عشان تطلعي طاقة الزعل، ادعي كتير (الدعاء بيغير القدر) مش عشان يرجع عشان تنسي وتقوي وتبقي قد المسؤولية، ماتعوديش تراقبيه ولا تبعتي حاجة ولا تسألي الناس عليه ولا تروحي الأماكن اللي بتفكرك بيه، دي مش قساوة دي عشان لو فعلاً حصل طلاق من غير رجعة متقفيش مكانك وتتعبي أكتر، قربي من أهلك، حبي نفسي حبي نفسك لو اهملتيها، حبي نفسي عشان تقدري و تكملي والناس تبدلك الحب ده".
اقرأ أيضًا: روان بن حسين تثير الجدل مجددا حول زوجها السابق: ”حرقت نفسي”
أسما شريف منير تحذر متابعيها من هذه الأمور
واختتمت: "لو قاعده في السرير مش قادرة تقومي هتقصري وهتتعطلي وهتندمي، ازعلي بس انتجي حتى لو طبخة حتى لو هتنظفي البيت، رتبي كل البيت ده بيطلع طاقة جبارة، وهتلاقي نفسيتك مرتاحة لو البيت رايق، اسمعي قرآن كتير... اللي حصل ده علمني كتير لأن الفشل في أي حاجة بداية نجاح ده شيء أكيد، والله الحياة هتبقى أحسن (ده إيماني القوي بربنا) إن مع العسر يسر، مفيش زعل أو وحش بس، أي حاجة صعبة آخرتها فرج، ما دايم إلا وجه الله".