محمد أنور عن يوسف الشريف.. بيخاف ربنا وأنا عملت حاجات ندمت عليها
أعرب الفنان محمد أنور عن استيائه من تعليقات البعض الساخرة والهجوم على الفنان يوسف الشريف، بعد تصريحاته حول رفضه المشاهد الساخنة وملامسة الممثلات في أعماله.
محمد أنور: يوسف الشريف بيخاف ربنا
وكتب محمد أنور عبر حسابه الخاص بموقع تبادل الصور والفيديوهات "إنستجرام"، : "ايه كل الهري والكلام الفاضي وقلة الأدب اللي حصلت عشان الراجل ده، قال إنه عنده مبدأ معين هو أنه ضد المشاهد الساخنة أو الأحضان والبوس والكلام ده لأنه ببساطه بيخاف ربنا ومش عاوز يغضبه".
أضاف: "وهو شغال بالمبدأ بقاله أكتر من عشر سنين وناجح بيه وربنا كارمه من وسع كمان، وأنه هو مش ضد اللي بيعمل عكس كده ولا شايف نفسه أكتر احتراما من حد".
محمد أنور: الناس طلعت مشاهد ليوسف الشريف وهو بيحضن
وتابع: "فجأه كل الناس شايفاه رجعي ومتخلف ومش فنان وناس قالت طب روح حجب مراتك الأول وبعدين اتكلم وناس طلعتله مشاهد من أعمال قديمة هو بيحضن فيها وقالوا أيام ما كان بيحب التلامس وكمية قلة أدب في موضوع الراجل طرحه بكل احترام وقال إنه فيه ممثلين كتير زيه أصلا مش بيحبو يعملو ده أو ندموا أصلا علي أعمال هما قدموها في البداية وبعدين شافو أنه ماينفعش أنه يعمل كده تاني".
محمد أنور: عملت حاجات ندمت عليها ونفسي ربنا يسامحني
وأنهى حديثه كاتبًا: "وعلي فكرة بقي هو صح والله العظيم وأنا نفسي اللي لسه ببدأ عملت حاجات وندمت أني عملتها ونفسي ربنا يسامحني عليها، افتكر أنك لما بتموت وأنت سايب صدقة جارية بتنفعك في قبرك وتزود حسناتك . .ممكن كمان تعمل عمل يعتبر ذنب جاري وبعد ما تموت يفضل يزود سيئاتك".
وكان الإعلامي رامي رضوان استضاف يوسف الشريف في برنامج مساءdmc، ووجه له رامي سؤال عن سبب عدم تصوير مشهد قيام سهر الصايغ بحمل الروبورت زين، في مسلسل "النهاية" الذي تم عرضه في الموسم الرمضاني المنقضي.
وقال يوسف الشريف، "منذ عشر سنوات وأنا أضع تلك القيود فى أعمالي وأشترط عدم التلامس، وكان فى البداية الاتفاق شفوي ثم حولت هذا الاتفاق إلى مكتوب فى عقد العمل".
اقرأ أيضًا: عاجل| وفاة الناقدة نعمة الله حسين بعد صراع مع المرض
واستكمل: "أعتقد أنها حرية شخصية، وقد اتخذت هذا المبدأ بعد فيلم هي فوضى وأتذكر أن أحد المخرجين الكبار قد عرض على فيلم وبعد قراءته، اعترضت على المشاهد الساخنة فى الفيلم، فجاء رد المخرج وأحد النقاد: "ماتشتغلش الشغلانة دي"، وبالفعل فكرت فى الاعتزال ولكن كرم الله استطعت أن أقدم العديد من الأعمال بهذا المبدأ .