لاعب سلة الأهلي: ”مش كل واحد يعمل بطل عشان يكسب تعاطف الجمهور”
علق مودي الجارحي لاعب الفريق الأول لكرة السلة رجال بالنادي الأهلي، على الأزمة الحالية التي ضربت الفريق الأحمر بسبب التصريحات بين أبنائه الكبار.
وكتب "الجارحي" عبر حسابه الرسمي على موقع التواصل الاجتماعي "فيسبوك": "النادي الأهلي خيره علينا كلنا موضوع مش محتاج للنقاش أصلا دي حاجة مفروغ منها، النادي الأهلي بيديك شهره وفلوس وحب الناس وكل حاجة حلوة يتمناها أي رياضي في مصر وفي إفريقيا وفي العرب".
تابع: "في نفس الوقت اللي إحنا في اليومين دول الموضوع مش محتاج إننا نزايد على بعض في حبنا للنادي الأهلي مش كل واحد هيطلع يعمل بطل دلوقتي عشان يكسب عطف جمهور النادي الأهلي، جمهور الأهلي محدش هيعرف يضحك عليه هما عارفين مين أهلاوي بجد ومين بيمثل أنه أهلاوي وأهم حاجة عنده مصلحته".
وواصل: "النادي الأهلي حلم لأي رياضي يخش من بوابة النادي، جماهير النادي الأهلي هيا الوحيدة اللي خيرها علي النادي الأهلي عشان الناس دي مش بتستفيد أي حاجة من النادي الأهلي غير أنها بتحب النادي من قلبها وبس وممكن يموتوا نفسهم عشان يشوفوا ناديهم بيكسب وبالعكس بيصرفه من جيبهم عشان يروحوا ماتشات".
وتابع لاعب سلة الأحمر: "هما دول اللي بجد بيضحوا عشان النادي الأهلي غير كده الكل بيستفيد من النادي الأهلي وطبعا في لعيبة كتير مخلصة وبتحب النادي من قلبها وضحوا بحاجات كتير عشان يكونوا موجودين في النادي، بس في الأول و في الآخر اللاعب أو المدرب أو الموظف أو العامل أو المسؤول، النادي الاهلي خيره عليهم كلهم".
اقرأ أيضًا: بعد تصريحات الكبار الغاضبة.. هل تسببت سياسة الخطيب في ”انقلاب” بين أبناء الأهلي؟
واختتم حديثه: "الحاجة المتأكد منها أن محدش هيخاف ولا هيحب ولا عايز مصلحة النادي أكتر من ولاده مع كامل احترامي للجميع، طبعا في استثنائات لعيبة بتيجي من برة النادي تحس أنهم متربيين جوا النادي، زي أبو تريكة بس دول حالات خاصة بييجوا كل فترة من الزمن".