الفن

رضا حامد: «عادل إمام مبيحبش حد يظهر جنبه والفرق بينه وبين سمير غانم كبير»

السبت، 17 ديسمبر 2022 10:55 صـ بتوقيت القاهرة

تحدث الفنان رضا حامد خلال لقاءه في برنامج "نص الكلام" مع الإعلامية راغدة شلهوب المذاع عبر قناة "النهار"، عن رأيه في عملية الإنتاج السينمائي وعن موقف جمعه بالفنان عادل إمام.

قال رضا حامد: "مرة اتعرض عليا عمل فني، وسألني حد من الإنتاج بتاخد كام؟ قولتله إني آخر عمل قدمته خدت 120 ألف جنيه فاعترض على المبلغ، يعني البطل ياخد 10 مليون ورضا حامد بدور مهم ياخد 100 ألف بس، هو ده عدل؟".

موقف بين رضا حامد وحسن الرداد

وقال: "مرة كنت بعمل مسلسل مع حسن الرداد، وهو اتدخل عشان أخد 100 ألف جنيه ومن بعدها متدخلش تاني ومجابنيش في أى عمل، عشان هو بيشتغل مع الشركة دي كتير، في حاجات بين الممثلين والإنتاج مبفهمهاش".

حديث رضا حامد عن عادل إمام

وبالحديث عن الفنان عادل إمام، قال: "مقولتش على عادل إمام غير إنه هرم من أهرامات الفن، ولما أقول موقف حصل بيني وبينه، أبقى راجل وحش؟، عادل إمام حقه إنه يحافظ على نجوميته لإنه فنان كبير، وعادل إمام من صغره محافظ على تركيبته، ومبيحبش حد يظهر جنبه".

وأكمل: "اشتغلت معاه مسرح وفيلم، ولما طلت اشتغل معاه تاني قالي أنا قدمتك وانت اشتغل بعيد عني، ولو كنت طلعت معاه في أفلامة كان زماني بقيت حاجة تانية خالص".

الفرق بين عادل إمام وسمير غانم

أضاف: "لما كنت بشتغل مع الفنان سمير غانم، كان أوقات كتير بيقترح عليا حاجات اقولها واعملها، والفرق بينه وبين عادل إمام كبير جدًا، عادل إمام عنده كل حاجة متحددة والإرتجال بحساب ولما كنا بنعمل مسرحية "بودي جارد" وسمع الناس بتضحك على حاجة قولتلها قالي هى المسرحية كوميدي ولا ايه؟".

أهم أعمال الفنان رضا حامد

قدم الفنان رضا حامد أكثر من 100 عمل فني، ومن أهم هذه الأعمال: فيلم "صايع بحر"، "أمير الظلام"، "عيال حبيبة"، "مطب صناعي"، "سيد العاطفي"، "الحب كده"، "العيال هربت"، "شبه منحرف"، "عمر وسلمى 2"، "جيم أوفر"، "البيه الرومانسي".