شلة الإعلام والصحافة في مصر!

الصحافة والإعلام في مصر عبارة عن شلة..

بيسهروا مع بعض ويجاملوا بعض وبيعزموا بعض ويطبّلوا لبعض وحتى على الفيس بوك بيعلقوا دايما عند بعض ويمنشوا بعض بتعريضات عالية قوي.

حضرتك مش من الشلة يبقى تركن، حتى لو كنت ثروت عكاشة.

مؤهلات عضوية الشلة أن يكون لسانك حلو وبتجامل حلو وبتعرف تمشي وراهم زي البهيمة.. بس.

حكاية شاطر أو بتفهم إعلام ولا لا، دي تحكيها لمراتك على الغدا.

فيه ناس من برّه الشلة بتحاول دايما تدخل الشلة علشان يركبوا شاشات وجرايد.. دمك خفيف على قلبهم هيدخّلوك ويشغّلوك.. تقيل مش هيسمحوا لك بأي شغل.

طيب لو نجحت في دخول الشلة؟

لو اكتشفوا إنك بتفهم إعلام بجد وليك رأي ووجهات نظر محترمة، فورا يقلبوا عليك ويلبسوك في حيطة.

ما هو لازم الشلة دي تبقى كلها شبه بعضها.. صفرية الفكر.

اللي ينور لازم يطفوه فورا علشان يبقى زيهم.

طب اللي بينور برّه الشلة؟!

تقوم الحرب عليه بدءا من تهمة الجنان لغاية تهمة الجاسوسية والعمالة، وعملوها في ناس كتير كانت ألماظ وودّوها في داهية، وكان آخرهم أسامة هيكل، وانتو ساعدتوهم بإنكم صدقتوهم ومشيتوا معاهم في أخبارهم وبوستاتهم الدنيئة عن الراجل. الله يسامحكم ساعدتوهم في تدمير الراجل اللي كان ابتدا يقف لهم.

دي الشلة اللي انت بتشوفهم يوميا على الشاشات وماسكة مناصب في جرايد.

أي صحفي أو إعلامي انت مستغرب إنه راكن.. اعرف إنه مش من الشلة.

عامة.. هي شلة لا تشرّف أي حد محترم أو بيفهم، ونهايتهم سودة.

اقرأ أيضًا: محمد عبد الجليل يكتب: ليه يا مصطفى سبته يضربك 16 قلم؟!