المخرج من حقه يبدع.. إحدي بطلات مسلسل أحمس تهاجم زاهي حواس

عبرت الفنانة مها نصار عن استيائها من إيقاف تصوير مسلسلها الجديد “الملك”، واستبعاده من السباق الدرامي الرمضاني المقبل، كما هاجمت وزير الآثار السابق زاهي حواس، بسبب انتقاده للمسلسل.

وقالت مها، عبر حسابها الشخصي بموقع التواصل الاجتماعي "فيسبوك": "كلام الناس فوق رأسي من فوق سواء بالسلب أو بالإيجاب، حقك تقول اللي أنت عايزه بس علشان أحترم كلامك، يبقا تتكلم صح وعن وعي ودا مبيتحققش غير بعد المشاهدة الجيدة للعمل"

وأضافت نصار: "أنا حابة أوضح حاجة، إحنا بنعمل عمل درامي مستوحى من التاريخ وليس فيلم وثائقي عن الملك أحمس وإلا كنا هنعمل اللي في التاريخ بالظبط إن الملك أحمس اتجوز أخته لأن في العصر ده كان جواز الأخوات عادي"

وتابعت:" لكن احنا بنعمل رواية اسمها كفاح طيبة للأديب العالمي نجيب محفوظ اللي قرأ الرواية هيفهم كلامي.. الأديب كان ليه رؤية مختلفة من خياله ودكتور زاهي حواس في كلامه لما قرأ الرواية قال إنها مستوحاه من التاريخ وليست التاريخ”.

وأردفت: "أنا مستغربة جدًا كلام دكتور زاهي حواس دلوقتي.. ما دام المخرج بيعمل رواية من خيال الكاتب ومستوحاة من التاريخ ودا طبعا مكتوب على المسلسل فمن حقه يبدع، عشان إيه نحصر الفن في دايرة ضيقة ونلف فيها"

اقرا ايضًا:الجمهور يحاصر مصطفي درويش ويعطل تصوير ”ضد الكسر”

وأكملت: "دا بيحصل في العالم كله ومش جديد أنه يضيف شخصية جديدة يغير شكل الممثلين يموت شخصية يطلعنا بنطير هو حر.. ولو كنا صبرنا كنا هنلاقي الكلام دا علي التتر.. الفن للتسلية والمتعة والحكم دايمًا بيبقي فيه للجمهور اللي احنا بتشتغل علشانه.. واحنا جمهورنا واعي كفاية إنه يغير القناة لو حاجة معجبتهوش".

وختمت: "وأنا بتحدي أي حد إنه بعد عرض الحلقة الأولى بس.. هيحصله انبهار وهيكمل المسلسل للآخر.. وهيحترم المجهود الكبير من كل صناع العمل..علشان تبقى ناقد وأحترم كلامك وأفهمه لازم تكون بتكتب كلام محترم وهادف أفهم منه فين أخطائي وأصلحها وتضيفلي شيء جديد ودا مبيحصلش غير بعد مشاهدة العمل وفي الحالة دي بس أسمعلك لأنك هتضفلي شيء..أنا فخورة جدا إني اشتغلت في مسلسل الملك".