تامر أمين ينفعل بسبب حادث أتوبيس المدرسة.. ويكشف عن لقطة إعجازية

انفعل الإعلامي تامر أمين، على سائق أتوبيس المدرسة الذي قاد الأتوبيس بشكل متهور، واصطدم بسيارتين في مدينة نصر.

وقال أمين خلال برنامجه "آخر النهار" على شاشة "النهار"، مساء الأربعاء: "الحمد لله إن ربنا ستر إن مكنش فيه تجمع ناس في المنطقة، ودي من ألطاف الله، لكني بقول للسائق إيه السرعة دي، هو أنت داخل رالي الفراعنة ده انت نازل من منزل كبوبري وفيه ملف".

وأضاف: "الحادثة حصلت في مدينة نصر يعني وسط الأحياء السكنية، يبقى ليه السرعة دي، مينفعش سائق أتوبيس مدرسة يكون متهور بالشكل ده، لازم السرعة تكون بطيئة جدًا علشان معاه أطفال".

وتابع: "التلاميذ أمانة في رقبتك، لازم تخلي بالك منهم، لازم الراجل ده يتعاقب حتى لو الأتوبيس فاضي، هو واضح إن طريقة سواقته كده، وبالتالي مينعفش يكون أمين على الأطفال".

وكشف أمين عما وصفها بـ"لقطة إعجازية" في الواقعة قائلًا: "في ولدين ماشين مع بعض، والطبيعي يكون العيال دي راحت في داهية، لكن سبحانه الذي يحيي ويميت، الولدين انكتب لهم عمر جديد، ودي آية من آيات الله من الحادث".