محكمة الأسرة اليوم 2020| زوج: مراتي اتجوزت عليا
تعدد الزوجات هو أمر شرعه الله، ولكن بعض السيدات يرفضن وجود زوجة ثانية، ولكن ماذا إن كانت الزوجة هي من تزوجت على زوجها .
"مراتي اتجوزت عليا، هو الشرع ربنا حلله لمين ليا ولا ليها، منها لله خلت سيرتي على كل لسان"، هكذا صرخ الزوج فى محكمة الأسرة بروض الفرج يطالب هيئة المحكمة بالعدل.
اقرأ أيضا: بقرار النائب العام.. 4 أيام حبس لشابين اعتديا على آخر من ذوي الاحتياجات الخاصة
وقال الزوج فى دعواه أمام محكمة الأسرة بروض الفرج: " اتجوزتها ١٠ سنين، كانت فيهم على عصمتي، عاملتها بكل حنية وحب، عمري ماحرمتها من حاجة، بس هي كانت طماعة، ومش راضية باللي فى إيديها، وقررت فجأة إنها مش عاوزاني وسابت البيت ومشيت" .
وأضاف الزوج فى دعواه أمام محكمة الأسرة بروض الفرج: " كلمتها كتير عشان ترجع رفضت، قولت أسيبها تريح أعصابها كام يوم فى بيت أبوها، وأنا كنت مسافر، رجعت بعد شهرين من سفر تبع الشغل، لقيتها مع راجل تاني وفى سريري، جريت جبت السكينة عشان أقتلهم، لكن الراجل بسرعة طلع عقد الجواز بينهم وقالى إنهم متجوزين ".
وتابع الزوج فى دعواه أمام محكمة الأسرة بروض الفرج: " الدنيا لفت بيا، لما إنت جوزها أومال أنا مين، لقيتها طلعت ورقة طلاق ومن أول نظرة عرفت إنها مزورة، قالت إنها رفعت قضية خلع والمحامي جابلها الورقة دي وقالها إن كده هى اطلقت، وقفت تايه وعاوز أقتل الراجل اللى معاها وأرجع كرامتي، وأقتلها هي كمان عشان قليلة الأصل، بس مكنتش عارف مين فينا المخدوع ".
وواصل الزوج فى دعواه أمام محكمة الأسرة بروض الفرج: " العشرة خلتني معرفش أستغني عنها، بس مكنتش أعرف إن أخلاقها للدرجة دي، تتجوز راجل تاني وهي فى عصمة جوزها الأول، أنا أصبحت حديث الساعة لكل الناس، طلبت الشرطة اللي فحصت عقد الجواز وأثبتت إنه صحيح، وأثبتت تزوير عقد الطلاق ".
وأكمل الزوج فى دعواه أمام محكمة الأسرة بروض الفرج: " مراتي وقفت تصرخ وتقول إن المحامي هو اللي قالها إنها كده حرة، وعرفها على العريس الجديد من باب الخدمة الشخصية، وفضلت تصرخ وتقول إني كنت بضربها وبعاملها بعنف وبهينها، بش ده عمره ماحصل، بالعكس الكل عارف إني بعاملها بما يرضي الله".
واختتم الزوج فى دعواه أمام محكمة الأسرة بروض الفرج: " حسبي الله ونعم الوكيل فيهم كلهم، دمروا حياتي وضيعوا مستقبلي، نسيت تعبي عشانها، إنسانة طماعة وغشاشة، وباعت نفسها عشان شوية فلوس، طعنتني فى رجولتي وخلت سيرتي على كل لسان، منها لله" .
ولا تزال الدعوى منظورة إلى الآن تنتظر الحكم.